Trabazos 1968
Fa mueitos años en Trabazos, el culleitizu yera una enfermedá ou mal de ojo que los ñiños tenían. Pensábase que las bruxas na más mirá a los rapaces podían fadeye mal, lo mismu que cuando se atopaba nu monte un llobu y lo miraba. Las supersticiones facían aparacé los conxuros y la maxia, pa podé asina faceye frente.
Había unos cuantos tipos de culleitizu, y asegún fuera también se facía. Pa sabé cual tenía el rapaz, las madres tenían en cuenta con lo que habían teníu contactu, pero muy importante yera cómo choraban y las cousas que facían. Por ajemplu se choraba mueitu y nun mamaba, ou se mamaba pero nun salía dun ser (que nun medraba).
Enumeramos unos poucos d’esos tipos de culleitizu y los remedios:
-Culleitizu del monte: cuando habían visto al llobu, se afumaban con cantruexa al pastor y al ñiñu. Outra manera yera que la madre lu llevara’l monte onde hubiera un cruce de caminos y al primer home que pasara ye decía: “home de buena fortuna, quítameye’l culleitizu a la criyatura”. El home pasaba por encima del rapá y ya quedaba sanáu.
-Culleitizu del recu: se pasaba’l ñiñu pol cubil de los recos deciendo: “culleitizu malu marcha d’eiquí, que’l cubil del recu vai tras de ti”.
-Culleitizu de la pita: yera’l que apillicaban las pitas cuando estaban guriandu. Había que barré la casa’l revés, en sentíu contrario, de fuera pa dentro. La broza (suciedad) que sacaban había que queimala. Despuéis afumaban al ñiñu y la casa con cantruexa.
-Culleitizu llargo: cuando duraba mueitu, el día que facían pan y con l’augua que sobraba, la madre llavaba las manos y al ñiñu, embruyándolo despuéis nuna sábana de llinu. Feita y tapada la masa del pan, ponían una pelleya de ouveya y al ñiñu encima tapáu con un cobertor, procurando que se durmiera, si facía falta dándoye la teta pa conseguilu. Pa que las cousas fuenan bien, el ñiñu y la masa tenían que despertase a la vez.
-Culleitizu nu fornu: el fornu yera muy importante nuna casa, además de facer el pan tamién servía pa la cura del culleitizu. Tirábanse tantas fabas dentro del fornu como fugazas había, despuéis poníase al ñiñu na pala y arrimábase a la buqueira del fornu las mismas veces deciendo: “culleitizu al fornu irás, y eiquí nun volverás”.
-Culleitizu na iglesia: un remediu más pa curá’l culleitizu, yera llevar al ñiñu a la iglesia y ponelo nu suelu mientras se facían las procesiones, pasando por encima algún santu o el palio con el cura.
Un saludo para todos.
Rosalía
